GIPAKUSGAN sa probinsyal nga panggamhanan sa Davao del Norte ang pakigbatok sa coronavirus nga sakit (COVID-19) pinaagi sa paghimo ug 45 ka mga ‘isolation rooms alang sa mga Persons Under Investigations (PUIs) ug aron sab mabawasan ang na-admit nga mga PUIs nga duna lamang ‘mild symptoms’ diha sa Davao Regional Medical Center (DRMC).

Andam na ang 15 ka mga isolation rooms nga gipatukod ni Gobernador Kuya Gov. Edwin I. Jubahib diha sa ikatulong andana sa DavNor Hospital Kapalong Zone samtang ang laing 30 kasamtangan nga gitukod diha sa DavNor Hospital Carmen Zone.

“Kini nga mga ‘isolation rooms’ maoy butangan sa mga PUIs nga duna lamang mild symptoms ug matabangan nato ang DRMC nga mag-concentrate sa grabe nga mga symptoms nga nagkinahanglan ug dihadiha medical nga pag-atiman,” matod sa gobernador.

Gipasabot ni Kuya Gob nga ang proyekto maoy bahin sa dinaliang pamaagi sa probinsyal nga panggamhanan aron menosan ang kadaot sa COVID-19 sa Davao del Norte.

Sa miaging semana, ang nasyonal nga panggamhanan nagsugo sa mga Local Government Units nga magbutang ug sariling ‘isolation rooms,’ usa ka pamaagi aron mapugngan ang pagkuyanap sa coronavirus.

Sa pagsugod, nagpagawas ang gobernador ug P16 milyones ingong ‘Quick Response Fund’ nga iyang gipataas ngadto sa P60.9 milyones aron gyod mapugngan ang hulga sa virus dinhi sa Davao del Norte.

Ang paningkamot sa probinsya nga pakusgon ang pamaagi sa pagpugong sa sakit ug ang pagpadako sa pondo miani ug positibong resulta.

Sumala sa taho sa Provincial Disaster Risk Reduction and Management Council (PDRRMC), hangtod alas 10:00 sa buntag, Marso 25, 2020, walay pa’y natala nga kaso sa COVID-19 sa Davao del Norte.

Sa 36 ka mga PUIs, gipapauli na ang 13 ka pasyente nga negatibo ang resulta samtang ang laing 23 anaa karon sa DRMC sa Tagum City.

Ang duha ka PUIs nga namatay negatibo sab ang resulta sa COVID-19.

Samtang aduna pa’y 2,190 ka PUMs ilawom sa self-quarantine, ang 2,361 na-cleared na human sa 14 ka adlaw nga self-quarantine nga walay nakitang mga simtomas.

Dugang gipasabot ni Kuya Gob Edwin Jubahib nga iya nang gihangyo ang Department of Education nga ipagamit ang ilang mga eskuylahan himoong puy-anan alang sa mga gahi’g ulo nga mga PUMs nga padayong nagbale-wala sa ‘self-quarantine’ nga pamaagi.

 

DavNor News