TULO ka adlaw na nga naghimo ug facemasks ang probinsyal nga panggamhanan ni Gobernador Kuya Gov. Edwin I. Jubahib aron mahulipan ang kakulangon ilabina ang gamiton alang sa mga frontliners sa pagpugong nga mokuyanap ang COVID-19 dinhi sa probinsya.

Nga nagpalit gyod ug bayente-sayis bag-ong makina pangtahi ug pinaagi sa Davao del Norte Employment Workforce Development Division (EWDD), 30 ka mga mananahi ang naningkamot nga mahuman ang tahas sulod sa unom ka adlaw.

“Ang gjmando ni Kuya Gob kailangan namo mag-produce ug overall 16,000 kapin nga mga facemasks. Gitagaan ra mi ug six days para mahuman ang sixteen thousand. So more or less, mga one week. Hopefully among mahuman basta okay lang ang materials kay usahay nagka-problema mi sa materyales kay di na namo makita dire sa mga malls, usahay moadto pami’g Davao,” matod ni Ms. Gloria Excelsa S. Pamugas ang division head sa EWDD.

Dugang ni Ms Pamugas nga ang mga mananahi gikan sa lain-laing barangay sa Tagum City ug ang uban gikan pa sa Asuncion.

“Sila atong gihangyo nga motabang pagtahi ug ato silang pagatagaan ug five pesos kada facemask nga ilang mahuman. At the same time gi-libre pod sila ni Kuya Gob ug paniudto ug snacks,” dugang pasabot ni Ms. Pamugas.
Gitug-an sa hepe sa EWDD nga sumala sa iyang nahibaw-an ang mga facemasks para sa katibuk-ang katawhan sa Davao del Norte pero i-prioritize ni Kuya Gob kadtong mga frontliners -- mga empleyado sa Kapitolyo ug kadtong mga tao sa nagkadaiyang munisipyo dire sa atong probinsya—ingong pang-dugang (augmentation) sa mga kagamitan sa LGUs.
Gikalipay sa EWDD chief ang bag-ong mga makina-pantahi sanglit kung mahuman na ang COVID-19 krisis daghan na ug magamit ang iyang buhatan alang sa mga livelihood training ug daghan pa ang maka-benepisyo.

“Laban lang para sa bayan,” pagdasig ni Pamugas sa mga mananahi nga naningkamot makahuman ug daghan.
Ang 16K facemask maoy “pasiuna” lang nga gihimo ug nagdepende unya sa kahimtang sa pagpugong batok COVID-19.