Pormal nga gi-turn over ni 1st Congressional District Administrative Head Alfonso Alvarez ang 3,800 ka mga COVID-19 test kits ngadto sa Probinsyal nga Panggamhanan sa Davao del Norte nga gipangunahan ni Kuya Gov. Edwin I. Jubabib, kaganihang buntag sa Provincial Capitol Building, Mankilam, Tagum City.

Kauban si Provincial Administrator Engr. Josie Jean Rabanoz, Provincial Health Officer ug Incident Commander Dr. Alfredo Lacerona, ug uban pang personahe sa kapitolyo, mainiton nga gidawat ni Kuya Gov ang mga tests kits nga gikan sa buhatan ni Congressman Pantaleon D. Alvarez sa kooperasyon sa Nanay Nicolasa Diaz Alvarez Foundation, Inc. (NNDAFI).

Ang mga test kits maoy gamiton aron mahibaloan ang status sa mga Persons Under Monitoring (PUM) sa probinsya isip pangunang mekanismo sa detection. Ang mga PUMs mao ang mga tao nga nibyahe sa laing nasud o lugar sa Pilipinas nga dunay kaso sa COVID-19 o dunay close contact sa mga Persons Under Investigation (PUI), pero sila wala nagpakita ug sintomas sa maong sakit.

Sa laing bahin, adunay 100,000 ka mga surgical masks ang anaa sa buhatan ni Congressman Alvarez nga planong iapod-apod sa mga katawhan sugod ugma. 10,000 niini ang ihatag sa Davao Medical Center ug kapin 2,000 ang ihatod sa Kapalong District Hospital. Lakip pud nga makadawat ang mga vendors ug mga mamalitay sa palengke, mga drayber sa pedicab ug uban pang mga pangpasaheroang sakyanan, mga front liners ug mga empleyado sa kapitolyo.