Imbis nga mupahulay aron mangandam sa iyang adlawng natawhan ugma, gipili ni Kuya Gov. Edwin I. Jubahib nga mutrabaho aron mag-apod-apod na usab ug mga ayuda sa kada barangay nga mukabat sa 27,157 ka mga food packs alang sa tanang pamilya sa Lungsod sa Carmen.

Wala nagdahom si Kuya Gov. nga sugaton sya sa mga barangay officials ug functionaries didto mismo sa tugkaran sa tanang 20 ka mga barangay sa Carmen sa mainiton nga pagdawat inubanan sa hugyaw nga pag-awit ug "Birthday Song", paghatag ug mga bulak ug aduna pay nag-andam ug mga birthday cake. Nauna na nga nihatag ug surpresa ang inahan sa Carmen nga si Mayor Virginia Perandos hinungdan nga nahimong mas ganado si Kuya Gov. sa pagtunol sa mga ayudang pangkosumo nga dunay 5 kilo nga bugas ug 5 ka de-lata.

Mapasigarbuhon nga gisibya ni Kuya Gov nga walay local trasmission nga nahitabo sa probinsya tungod sa kooperasyon sa tanan sa pagtuman sa mga regulasyon sa quarantine sama sa dili paggawas sa panimalay ug pagbuhat sa bisan unsang klase sa tapok ug paglimita sa lihok sa tanang katawhang Dabaonon.

Mapasalamaton usab si Kuya Gov. sa mga inisyatibo sa mga barangay aron matabangan ang lokal nga panggamhanan hinungdan nga nisaad kini nga makadawat ug ayuda ang tanang barangay officials ug functionaries isip ganti sa ilang maayong mga lakang.

"Kung ang gobyerno ug ang katawhan magtinabangay, walay problema nga dili masulbad" kini ang mga pulong ni Kuya Gov ngadto sa tanan isip pahinumdum sa importansya sa kooperasyon, disiplina ug hiniusa nga tumong.

Kauban ni Kuya Gov. ang mga opisyales sa LGU Carmen, pipila ka department heads ug empleyado sa kapitolyo ug pwersa sa kapulisan nga gipangunahan ni PCol. Ranie Hachuela.