One Team gyud nga mihatod ug ayuda ang Probinsyal nga Panggamhanan sa Davao del Norte ug Lokal nga Panggamhanan sa Panabo alang sa unang adlaw sa food packs distribution sa dakbayan.

Ang kainit sa panahon wala makapugong sa mga lider nga gipangunahan mismo ni Kuya Gov. Edwin I. Jubahib aron sa paghatod sa mga hinabang nga adunay 5 kilong bugas, de-lata ug sabon/face mask/alcohol didto mismo sa 20 ka mga lagyong barangay sa Panabo. Mukabat sa 72,935 ka mga food packs ang ipanghatag sa duha ka adlaw nga relief operations.

Dako ang kalipay sa mga katawhan, ilabi na ang namuyo didto sa mga ngilit nga mga barangay, sa dihang nakita nila ang mga lider nga personal nga ninglantaw sa tinuod nila nga sitwasyon. Kauban ni Kuya Gov ang mga aktibong opisyales sa Lokal nga Panggamhanan sa Panabo City sa panguna ni Mayor Jose Relampagos, Vice Mayor Janrey Gavina ug mga Sangguniang Panlungsod Members.

Matud pa ni Kuya Gov., naningkamot gyud ang probinsya sa pagre-align sa budget aron mahatagan ug ayuda ang katawhan. Iyang gipasalamatan ang Sangguniang Panlalawigan sa liderato ni Vice Governor Rey Uy ug mga SP Members. Anaa usab kagahapon ang mga Board Members sa District II nga sila Hon. Jannet Tanong-Maboloc, Hon. Franklin Gentiles, Hon. Roy Catalan ug Hon. Janris Jay Gavina. Mapasalamaton usab si Kuya Gov. sa suporta ni Congressman Alan Dujali nga niuban usab sa grupo.

Padayon nga gipahinumduman ni Kuya Gov. ang katawhan sa pagsunod sa mga quarantine measures ingon man ang pagtanom sa mga gulay, lagutmon ug uban pang klase sa pagkaon nga pwedeng makuha sa palibot. Iya pud nga gipadangat ang iyang kalipay sa hugot nga suporta sa mga barangay sa mga lakang sa probinsya batok COVID-19 hinungdan nga iyang gihatagan ug dugang 5 ka kilong bugas ang mga functionaries, 10 ka kilong bugas alang sa mga Barangay Kagawad ug usa ka sakong bugas alang sa mga Punong Barangay.

Ang grupo usab sa Probinsya gilangkuban ni Provincial Administrator Engr. Josie Jean Rabanoz, Provincial Social Welfare and Development Officer Rosalinda Rapista, Provincial Information Officer Dr. Mervin Jay Suaybaguio ug DNPPO Chief PCol. Ranie Hachuela, ug mga empleyado sa kapitolyo.

 

 

 

 

DavNor News