Gipulong ni Kuya Gov. Edwin I. Jubahib ang tanang Department Heads sa kapitolyo pinaagi sa Executive Meeting aron hisgutan ang pagpangandam sa Probinsyal nga Panggamhanan sa Davao del Norte sa "New Normal" pinaagi sa food sufficiency program nga anaa sa planning stage sa karon.

Gisiguro sa maong programa nga dunay saktong suplay sa pagkaon sa probinsya alang sa tanan ilabi na sa pinaka-apektadong mga katawhan sa COVID-19. Sa inisyal nga panaghisgut, mukabat sa 300 ka mga trabahante sa kapitolyo ang madeploy sa nagkadaiyang barangay aron mutabang sa katawhan sa pagtanom, pagbaligya sa abot ug pagmonitor sa maong programa.

Dugang sa mga gulay ug uban pang tanom pangkunsumo, gisugyot pud ni Kuya Gov ang pagtanom sa mga kahoy sama sa falcata, mahogany ug uban pang mga lig-on ug high-valued nga mga kahoy.

Prayoridad sa program ang personal nga mga luna sa katawhan ug kadtong mga gipanag-iyahan sa gobyerno aron tamnan sa mga gulay, prutas ug mga kahoy aron masiguro nga dunay igong suplay sa pagkaon ug dugang panginabuhian ang katawhan. Giplastar pud sa meeting ang mga manguna nga opisina sa kapitolyo sa pag-implementar sa programa ug pagsiguro nga kini malungtaron.

Sa laing bahin, gihisgutan usab ang pagpakusog sa sistema sa pagdawat sa katawhan nga dunay transaksyon sa kapitolyo sama sa pagtaod ug cellophane barriers sa mga tents ilawom sa mga acacia ug pagbutang ug mga nurse sa mga ganghaan. Pakusgan usab ang strikto nga pag-implentar sa mga quarantine measures sa mga pribadong establisamento pinaagi sa tabang sa pwersa sa mga lokal nga panggamhanan ug Philippine National Police.

 

 

 

 

DavNor News