Davao del Norte - Tanang tao adunay katungod nga sibil, political, ekonomikanhon, sosyal, kultural ug kagawasan, katungod mabuhi nga walay diskriminasyon gikan sa uban o sa komunidad. Apan bisan pa sa klarong balaod nga naga panalipud niining mga katungod, daghan gihapon ang makabati ug paniglain labaw na sa atong mga kaigsoonang myembro sa sector sa Persons with Disability (PWD) kon adunay kakulangan.

Ang maong forum sa katungod sa mga PWD’s subay sa ika-38 nga selebrasyon sa National Disability Prevention and Rehabilitation Week kundiin kabahin niini ang paghatag ug hisgutanan sa mga katungod ug pribilihiyo sa maong sector (PWD Rights and Privileges).

Gipangunahan sa Provincial Social Welfare and Development Office (PSWDO) ang maong kalihokan, kauban ang Commission on Human Rights (CHR), Department of Trade and Industry (DTI), Technical Education and Skills Development Authority (TESDA), Department of Labor and Employment (DOLE), ug Department of Public Works and Highways (DPWH).

Gi-awhag ni Gobernador Anthony del Rosario sa iyang mensahe ang katawhan nga magtinabangay sa pagpalig-on sa mga katungod sa matag PWD aron mas mahasa pa ang ilang dakong potensyal.

“Let us work together to secure a just society where no one is left behind (magtinabangay kita aron mahiaguman ang hapsay nga komundad kundiin walay mabilin padulong sa kalambuan)”, pamulong sa Gobernador.

Dugang niya nga sa usa ka progresibong komunidad, angayan lamang nga dungan ang paglambo sa matag katawhan ug walay dapat mabiyaan. Sa atong pagtinabangay makab-ot nato ang komunidad kundiin dili kinahanglan sa usa ang mo-shagit sa iyang mulo aron madungog.

Gihisgutan usab ang mga prebilihiyong madawat sa usa ka myembro kung sila magpa-rehistro isip PWD sa probinsya.

Sulti ni Moises Escobar, ang president sa hut-ong sa PWD sa B.E. Dujali nga importante kayo ang maong forum sanglit mahibal-an nila ang mga prebilihiyo nga ilang makuha ug kung unsa ang mga katungod nga nagpalukop kanila.

“Lisud ang kinabuhi labaw na kung bata pa ka, daghan magsungog-sungog, maka-experience gyud ka ug diskriminasyon”, saysay niya.

DavNor News