GIDAYEG ni Gobernador Anthony del Rosario ang pagtinabangay sa gobyerno ug pribadong sektor alang sa proyektong pabalay atol sa ika-5 nga anibersaryo sa Gawad Kalinga Village kagahapon Hulyo 19 didto sa Datu Abdul Dadia, Panabo City.

“Mao kini ang katuyoan sa atong programa sa probinsya nga LIPAD-UK. Mapasalamaton ako nga uban kamo isip partners alang sa epektibong kausaban sa atong katawhan,” pagdayeg ni Gob AGR nga nagtumong sa paningkamot sa probinsya nga Localized Integrated Programs Approach for Development through Ugmad Komunidad (LIPAD-UK), LGU Panabo alang sa luna nga gitukoran sa mga balay, pagbansay nga gihatag sa Technical Education and Skills Development Authority (TESDA) ug Holcim, ang pinakadako nga tighimo ug semento nga nakabase sa Davao City.

Gawas sa balay, nakadawat sab ug dumalayon nga kaayohan ang pipila ka mga benepisyaryo tungod sa 27 ka adlaw nga pagbansay saTESDA ug Holcim ingong “mason.” Ingong resulta, 34 kanila nagtapos nga nakadawat ingong sertipikadong National Competency Level 2 (NC2).

“Importante kini sanglit dala niini ang panginabuhian alang sa atong mga benepisyaryo sa GK dinhi sa atong barangay. Mahinungdanon kaayo nga mahatagan ug higayon ang atong katawhan nga mapalambo ang ilang kinitaan aron mabuhi nga dunay dignidad ug aron mousbaw ang ilang kapasidad sa pagpartisipar sa padayong paglambo sa atong ekonomiya,” padayong pagdayeg sa Gobernador sa paningkamot sa TESDA ug Holcim kinsa naghatag usab ug lain-laing kagamitan sa konstrukyon. 
Ang ubang balay ginapuy-an na sa mga benepisyaryo nga kasagaran kanhi nagpuyo daplin sa baybayon ug mga kanal sa Panabo City samtang ang ubang yunit padayon pa nga ginatukod. 
Gipasabot sa bag-ong milingkod nga gobernador nga katuyoan gayod sa iyang administrasyon nga mahimong tigtagana ug kaayohan alang sa katawhang Dabaonon.

“Ang singgit sa akong administrasyon mao ang Abilidad ug Malasakit kun “AMA.” Buot ipasabot nga atong tagaan ug dakong pagtagad ang edukasyon, panglawas, panarbaho ug panginabuhian, desenteng pabalay ingon man ang kinahanglanong serbisyo publiko sa ubang nag-unang programa alang sa katawhan,” pasalig ni Gob AGR isip pagsubli sa iyang saad atol sa kampanya ngadto sa mga nagpuyo sa GK Village. (pioDavNor)

DavNor News