HUMAN sa duha ka beses nga pagpanghatag ug food packs sa tanang pamilya sa Davao del Norte, mihimo ug “espesyal” nga pagtunol si Gobernador Edwin “Kuya Gob” Jubahib ngadto sa halos 21,000 ka mga traysikel (trayxi) draybers ug 3,000 ka mga Barangay Health Workers ug Barangay Nutrition Scholars workers.
“Mga igsoon sayod mo nga gikan sa pag-lockdown tungod sa COVID-19 mao na’y problema nga atong giatubang karon. Hinungdan nga naghatag ko’g food packs para ninyo. Bisan Modified General Community Quarantine na ta nasayod ko nga ang mga kaigsoonang draybers ang pinaka-apektado. Pila ka bulan nga way biyahe, karon naay biyahe di pod mo kapamasahero’g daghan kay 50% ra ang gi-allowed. Busa naka-decide ko kauban ang atong Vice Governor ug mga Board Members nga manghatag sa mga drayber tibuok probinsya, tag five kilos para makatabang-tabang sa inyong pamilya. Sa mga Barangay Health Workers, BNS, kamo man pod ang mga frontliners, kamo ang naningkamot ma-protektahan ang panglawas sa mga kaigsoonan diha sa barangay, mao nang naa po’y inyoha,” pasabot ni Kuya Gob sa mga drayber ug mga BHWs sa Talaingod.
Sa pagtunol sa hinabang, gipahimangnoan sa Gobernador nga dili gyod magkumpyansa.
“Hangyoon ta mo ayaw gyod ug kumpyansa. . magsuot mo’g facemasks. Mga drayber, kamo ang pinaka-vulnerable nga nanginabuhi sa atong community, kamo ang dali posibleng matakdan aning COVID. Wa mo kaila nang inyong gipasakay basig naay gikan sa lugar nga affected sa COVID. Ang inyong tuyo panginabuhi. Kanunay ko manawagan sa inyoha nga mogamit gyod pirme ug facemask. Kung naay pasahero nga mosakay nga way facemask ayaw pasakya. Kay wa ta masayod kinsay nagdala karon aning COVID-19. Unya Balik Probinsya na ra ba ta,” hangyo ni Kuya Gob kay nabalaka nga basin hinungdan pod ni nga matakdan ang ilang pamilya.
Dugang gipasabot sa Gobernador nga luyo sa peligro gikinahanglan sab nga manginabuhi ilabina ang pagpananom sa taga Talaingod tungod sa luag, way tanom nga kayutaan hinungdan nga halos kada semana gihatod ang klase-klaseng semilya sa mga lagutmon, kahoy ug mga gulay.
“Samtang nag-atubang ta sa COVID-19 dili pod puyde nga dili ta mopadayon sa atong adlaw-adlaw nga panginabuhi. Mao na nga sige ko’g anhi sa Talaingod tungod kay nakita nako nga ang lungsod potential kaayo para sa panginabuhian. Dinhi daghan pa kaayong bakanteng yuta. Galing lang walay nagtanom. Mao na nga halos kada semana nagdala ko’g semilya sa lubi, saging, kamote, mga gulay, Falcata, mahogany; 100 thousand tanan kay gusto nakong matamnan ang yuta. Angayan mananom dili lang mga IPs apil ang mga Bisaya magtanom ug gulay sa inyong tugkaran. Tamni ninyo, libre ang semilya. Kung kining yuta sa Talaingod matamnan tanan, mobalik ang atong maayong kinaiyahan, ang atong Mother Nature. Mobugnaw ang Talaingod ug ang syudad mobugnaw sab,” kusganong pag-awhag sa gobernador.
Sobra 2,180 ka sakong bugas ang nahatod sulod sa tulo ka adlaw nga pag-apod-apod niadtong Hunyo 18-20.
